முன்னாள் எம்.பிக்கள் எட்டு பேருக்கு அதிர்ச்சி செய்தி

அனுமதியின்றி உத்தியோகபூர்வ இல்லங்களில் தங்கியிருந்தமைக்காக செலுத்தவேண்டிய உரிய அபராதத் தொகையை விரைவில் செலுத்துமாறு முன்னாள் நாடாளுமன்ற உறுப்பினர்கள் எட்டு பேருக்கு நாடாளுமன்றத்தினால் அறிவிக்கப்பட்டுள்ளது.

கடந்த பொதுத்தேர்தலில் தோல்வியடைந்த பின் தமது உத்தியோகபூர்வ இல்லங்களை விட்டு வெளியேறாது, இதுவரையில் அபராதத்தையும் செலுத்தாத முன்னாள் நாடாளுமன்ற உறுப்பினர்கள் எட்டு பேருக்கே இவ்வறிவிப்பு வெளியிடப்பட்டுள்ளது.

மேலும் நீர் மற்றும் மின்சாரக் கட்டணங்களையும் உடனடியாக செலுத்துமாறு இரண்டாவது தடவையாக அறிவித்தல் விடுக்கப்பட்டுள்ளது.

இவ்வறிவிப்புக்களை அவர்கள் புறக்கணித்தால் நீதிமன்றத்தை நாட வேண்டிய நிலைமை ஏற்படுமென நாடாளுமன்றம் தெரிவித்துள்ளது.

அனுமதியின்றி உத்தியோகபூர்வ இல்லத்தில் ஒருநாள் தங்குவதற்கு 500 ரூபாய் அபராதம் விதிக்கப்படுகின்றமை குறிப்பிடத்தக்கது.