வவுனியா பல்கலைக்கழக அணியை வென்றது கல்லூரி அணி

வவுனியா தேசியக் கல்வியியற் கல்லூரியில் இடம்பெற்ற உதைபந்தாட்ட போட்டியில் கல்லூரி அணி வவுனியா பல்கலைக்கழக அணியை வெற்றிகொண்டது.

வவுனியா தேசிய கல்வியியற் கல்லூரியின் 31 ஆவது ஆண்டு பூர்த்தியை முன்னிட்டு வவுனியா தேசிய கல்வியற் கல்லூரி அணிக்கும் வவுனியா பல்கலைக்கழக அணிக்கும் இடையில் இடம்பெற்ற சிநேகபூர்வ உதைபந்தாட்ட போட்டியில் கல்லூரி அணி 6:0 என்ற கோல் அடிப்படையில் பல்கலைக்கழக அணியை வெற்றி கொண்டது.

கல்லூரியின் பீடாதிபதி ஜி.கமலகுமார் தலைமையில் உடற்கல்வி விரிவுரையாளர்களின் ஒழுங்கமைப்பில் இடம்பெற்ற இப்போட்டியில் கல்லூரி அணிசார்பாக ஹரிகரசுதன் மற்றும் மோகனகீதன் தலா இரண்டு கோல்களினையும் ரிவ்னாஸ் மற்றும் சதுர்சன் தலா ஒரு கோலினையும் போட்டு அணியினை வெற்றிப்பாதைக்கு இட்டுச்சென்றனர்.

கல்லூரி மைதானத்தில் இடம்பெற்ற இப்போட்டிக்கு பிரதம நடுவராக உடற்கல்வி ஆசிரியர் சுதாத்தரன் கடமையாற்றியதோடு போட்டி நிகழ்வில் வவுனியா தேசிய கல்வியியற் கல்லூரியின் உபபீடாதிபதிகள், விரிவுரையாளர்,கல்லூரியின் ஆசிரியமாணவர்கள் என பலரும் கலந்து சிறப்பித்தனர்.