நாளையதினம் பதவியேற்கிறது புதிய அமைச்சரவை

நடைபெற்ற நாடாளுமன்ற தேர்தலில் புதிதாகத் தேர்ந்தெடுக்கப்பட்ட மக்கள் விடுதலை முன்னணி தலைமையிலான தேசிய மக்கள் சக்தி அரசாங்கத்தின் அமைச்சரவை நாளையதினம் (18) பதவியேற்க உள்ளதாகத் தெரியவருகிறது.

தேசிய மக்கள் சக்தியின் தகவலின்படி, முந்தைய அரசாங்கங்களை விட குறிப்பிடத்தக்க வகையில் அமைச்சரவை சிறியதாக இருக்கும் என்று உறுதிப்படுத்தியது.

நிர்வாகத்தை சீராக்குவதற்கும் செயல்திறனை மேம்படுத்துவதற்கும் அரசாங்கத்தின் உறுதிமொழிக்கு இணங்க, அமைச்சர்களின் எண்ணிக்கை 25க்கும் குறைவாகவே இருக்கும்.

புதிய நாடாளுமன்ற உறுப்பினர்களுக்கான சத்தியப்பிரமாணம் வியாழக்கிழமை (21) நடைபெறவுள்ளதுடன், ஜனாதிபதி அநுரகுமார திஸாநாயக்க அன்று மாலை நாடாளுமன்றத்தில் உரையாற்றவுள்ளார்.

நேற்றைய நிலவரப்படி (16) தேசிய மக்கள் சக்தி தனது அமைச்சரவை அமைப்பை இறுதி செய்து வருகிறது. அமைச்சரவையின் கட்டமைப்பு குறித்து ஆலோசிப்பதற்காக நேற்று(16) காலை விசேட கூட்டமொன்று இடம்பெற்றதாகவும், நேற்று இரவுக்குள் இறுதி அமைச்சரவை பதவிகள் உறுதிப்படுத்தப்படும் என எதிர்பார்க்கப்படுவதாகவும் தகவல்கள் தெரிவிக்கின்றன.

ஜனாதிபதி அநுரகுமார திஸாநாயக்க புதிய அரசாங்கத்தின் கொள்கை அறிக்கையை நவம்பர் 21 ஆம் திகதி பிற்பகல் 3 மணிக்கு 10 ஆவது நாடாளுமன்றத்தின் சம்பிரதாய அமர்வின் போது சமர்ப்பிக்கவுள்ளார்.

33(a) பிரிவின் கீழ் அரசியலமைப்புக்குத் தேவையான கொள்கை அறிக்கை, வரவிருக்கும் காலத்திற்கான அரசாங்கத்தின் திட்டங்கள் மற்றும் நாடாளுமன்ற முன்னுரிமைகளை அவரது உரை கோடிட்டுக் காட்டும்.

அமர்வானது உத்தியோகபூர்வமாக காலை 10 மணிக்கு ஆரம்பமாகும், பிற்பகலில் கொள்கை அறிக்கை சமர்ப்பிக்கப்படும். இதைத் தொடர்ந்து, புதிதாக தேர்ந்தெடுக்கப்பட்ட எம்.பி.க்களுக்கான நாடாளுமன்ற அமைப்பு குறித்த மூன்று நாள் பயிலரங்கம் நவம்பர் 25-27 வரை நடைபெறவுள்ளது.

புதிய நாடாளுமன்ற உறுப்பினர்களுக்கான பதிவு நவம்பர் 18 மற்றும் 20 க்கு இடையில் நடைபெறும், இந்த காலகட்டத்தில் நாடாளுமன்ற ஊழியர்களின் விடுமுறை ரத்து செய்யப்படும்.